الاثنين، ١٥ سبتمبر ٢٠٠٨

هام جدااااااااااااا ورمضان كرررررررريم

النهارده مش جايه اكلمكم فى خطب ولا مواعظ انا بس هسيبكم مع الصورة دى واكيد هتفهموا منها انا عاوزة اقولكم ايه هى عباره عن تذكرة او تنبيه للى ناسيين مننا اننا فى رمضان او اللى ساعات بيشاور عقله يشوف برنامج او مسلسل يلا بقى بعد ماتشوفوا الصورة كله يلحق نفسه لسه قدامنا فرصه قبل رمضان مايخلص ونضيعوا هدر

الأربعاء، ١٠ سبتمبر ٢٠٠٨

عالم اطفال


انا عارفه ان ناس كتير هتقول عليه مجنونه وان المواضيع او الحاجات اللى بعملها فى مدونتى ملهاش علاقه باسم المدونه ( احكى وهسمعك) بس دا يمكن لان مفيش حد يحكى مش لانى مبسمعش هههههههه المهم انا حبيت انزل الصور بتاعت الاطفال دى فى المدونه اولا عشان انا بحب الاطفال وثانيا عشان كل الناس اللى بتحب الاطفال زيى قولت احتفظ بالصور دى هنا واظن مفيش اجمل من كده صور فى الدنيا

عشنا وشوفنااااااااااا وعجبى على رجاله اخر زمن

سرحانه فى ايه يابت انتى يابت

هى دى الارانب ولا بلاش

لا تعليق بس انتى قمر برضوا

غزالوووووووووووووون يهبلووووووووووووووووووووووووون

دكتور ملص ياجدعااااااااااااااااااااااااااااااااااااااااااااااااااااااااااااااااااااااااااااااان

وهى دى اخرت السهر قدام الكمبيوتر( الهانم نايمه )

الثلاثاء، ١٢ أغسطس ٢٠٠٨

عودة جديدة


اول مرة ارجع اكتب وارجع للمدونه اللى عملتها من حوالى سنه ومعرفش ليه بالذات قررت اكتب النهارده تانى يمكن لان المدونه وحشتنى اوى او يمكن لان جوايا كلام كتير مش هقدر اطلعوا الا هنا على مدونتى اللى اكتشفت انها غاليه اوى عندى ويمكن بسبب تشجيع المدونين ليا وطلبهم المستمر انى ارجع واكتب تانى مع انى مكنتش مقتنعه ان ليا فى الكتابه والتدوين اصلا بس كل واحد وله اسلوبه ومش لازم كل المدونين يكونوا نسخه من بعض ( لولا اختلاف الازواق لبارت السلعه) احنا مش سلع طبعا بس دا تشبيه مش اكتر يعنى انا اقتنعت ان مش لازم كل المدونين يكونوا اساتذة فى الكتابه المهم اننا نطلع اللى جوانا بأى طريقه وبأى اسلوب واكيد هنلاقى حد يسمع ويقدر ويحس بالكلام ده ويمكن حد يشوف ان المدونه وصاحبتها ملهومش معنى ولا لازمه بس انا مش مطلوب منى ارضى كل الناس انا بطلع شئ جوايا وبس يمكن لنفسى وجايز ناس تانيه تلاقى تشابه بين اللى جوايا وبين اللى جواهم ومش قادرين يطلعوا عشان كده هرجع اكتب قريب فى المدونه ان شاء الله

الثلاثاء، ٢٥ مارس ٢٠٠٨

خواطر ( نظرة متشائمه جدااااااااا )

ذات يوم او نخليها بالبلدى كده فى مرة سرحت مع نفسى وحاولت افكر فى الحياة اللى احنا عيشنها دلوقتى طبعا مش محتاجه اى شرح او توضيح وعارفين انا قصدى اتكلم عن ايه .. انا اقصد اتكلم عن احوالنا احوال الناس والبلد اللى بقت صعب السكوت عليها انا بقيت خايفه ييجى علينا اليوم اللى نبقى شبه اهل البلاد اللى فيها مجاعات وفعلا حاسه ان ده هيحصل قريب جدا . الحياة بقت لا تطاق فى مصر ودا مش هجوم او انى بكره بلدى بالعكس انا بحب مصر جدا وعارفه انها مهما تقسى علينا بنحبها
بس انا مش حاسه بالامان فى بلدى خايفه من بكرة حاولت ادور على اى شئ حلو يطمنى ملقتش يعنى مثلا بطاله تلاقى ..فقر وشحاتين وناس متبهدله فى طوابير العيش تلاقى .. اسعار بتزيد كل يوم بمعدل الضعف تلاقى.. عوانس وشباب نفسه يتجوز ومش عارف تلاقى وموجود وبوفرة ويمكن هى دى الحاجات اللى ربنا مكتر فيها عندنا اوى .. ناس بتموت ومن غير ذنب وارواحهم ملهاش تمن تلاقى .. من الاخر اكل او بمعنى اصح عيش حاف بكرة مش هنعرف نلاقيه .. علاج ومستشفيات ادميه تعيش انت ياحاج والمصيبه ان لما تحصل حادثه وتحاول تنقذ انسان فيه الروح لسه يموت بسبب ان معندناش طيارة هيلكوبتر تنقلوا بسرعه زى الناس والبلاد المحترمه مابتعمل مع المواطنين بتوعها ..
اقول ايه ولا ايه يمكن اكون متشائمه واللى هيقرا الكلام ده هيتعقد اكتر ويلعن اليوم اللى دخل فيه المدونه وقرا الكلام ده وفى ناس هتقولى فكرتينا ليه ما تسيبينا اهو احنا عايشين والسلام واما نشوف اخرتها ايه ليه نقدر البلاء قبل وقوعوا
بصراحه اعزرونى انا اصلى حسيت انى هيجرى لى حاجه لو متكلمتش اهو حاجه تصبرنى على اللى جاى اعتبروها فش غليل .
من ضمن الافكار اللى جت على دماغى انى حاولت الاقى سبب للى احنا فيه وقولت ليه زمان واحنا تعدادنا كان حوالى 25 مليون ودا طبعا فى ايام الخمسينات والايام الحلوة دى الناس ايامها عمرها ما اشتكت ولا اتبهدلت كده كان كل حاجه عندها موجودة ولا اسعار زمان ياعينى عليها اللحمه كانت بالرطل مش دلوقتى بالكيلو والرطل مش عارفه بكام سحتوت ولا ساغ دلوقتى بجنيهات وقدرها ولن اذكر المبلغ بالظبط لانها قد تختلف من بلد الى اخرى داخل مصرنا الحبيبه حفظها الله ورعاها هى واللى فى بالى
المهم انا قولت اذا كان احنا دلوقتى خمسه وسبعين مليون وكل يوم بنزيد اكتر والاسعار والعيشه بتغلى والبطاله بتزيد هنعمل ايه لما نبقى مائه مليون ويارب مش عاوزة اعيش لحد مانبقى بالعدد ده لان ساعتها هتبهدل اوى على راى المثل الشعب تعب ياتريحوا ياتخدوا هو واللى فى باللى ( عارفينوا طبعا )

محدش يزعل واللى متشائم يتشائم اكتر واللى متفائل يقولى متفائل على ايه ويعطينا مما اعطاه الله ( حبه تفائل لله )

الخميس، ١٣ مارس ٢٠٠٨

يامرحبا بالتاجات


تالت تاج يتمررلى بس المرة دى التاج ده من اختراع عبدالرحمن او الواد الدكتور عبدالرحمن صاحب اجدع مدونه وكلنا عارفنها طبعا هى مدونه الصيدلى المطحون قال يعنى انت مطحون ياعبدالرحمن ( انت مووووووس مذاكرة ياسوسه) اللهم لا حسد انا خلصت خلاص وعينى مش فى صيدله ولا حاجه المهم نشوف التاج



س1... لو مكنتش مصرى بس عربى كانت هتبقى ايه نظرتك للمصريين؟ واللى بيحصل فى مصر دلوقتى؟

اولا ده سؤال لئيم طحن ياعبدالرحمن عاوزنا نشتم فى نفسنا بس بالزوق عموما اقولك ياسيدى لو كنت من اى بلد تانى كنت هقول المصريين دول مطحونين ياعينى ومش لاقيين ياكلوا عيش حاف حته ورئيسهم ماسك البلد بايد من نار مش عارفين يتنفسوا ياعينى معاه



س2... لو كنت اوربى او غير مسلم كانت هتبقى ايه نظرتك للعرب والمسلمين؟

كنت هقول العرب دول اى كلام ناس خيخه يعنى ومتخلفين بس ده مش رايى طبعا ده رايى وانا عامله اجنبيه يعنى وتقريبا هى دى نظرتهم لينا اننا شعوب همجيه ومتخلفه من دول العالم التالت ومتاخرين فى كل شئ حتى بلادنا مش عارفين ندافع عنها واموات ياعرب اموات ( امجاد ياعرب امجاد سابقا)




س3... لو قالولك انك بقيت رئيس جمهوريه كنت هتعمل ايه؟

اولا ايه الفال الحلو ده ( ايقون منشكح اوى ) دنا كنت عملت عمايل وسويت الهوايل ... دعونا نعمل فى صمت اصلى مش بحب اقاطع ودارى على شمعتك تقيد وتشعلل كمان هههههههه




س4... لو كان ينفع ترجع طفل تانى .. ترجع؟ وليه؟

اتمنى من الله ان ايام الطفوله تعود طبعا ولو كان ينفع كنت هكون اول واحده تعيل ونعيد ايام المعيله والطفوله تانى ..ببساطه الايام دى انا بعتبرها اجمل ايام عمرى على الاقل الواحد يفضل طول عمروا من غير مايشيل هموم ولا مسؤليات ولا يتعب لان كل مابتكبر وتعرف اكتر على اد مابتعرف على اد مابتتعب كل ما يبقى الانسان بسيط كل ما اعبائه وهمومه تقل وحياته تبقى اسعد




س5... لو انت طبيب وعندك مريض ميؤوس من حالته تصارحه بالحقيقه والامر الواقع ولا تغرس فيه الامل لغايه مايموت؟

اغرس فيه الامل لاخر لحظه انا من رايى ان الكدب فى الحاله دى افضل من الصراحه وبعدين الموت والحياة بايد ربنا بس ولا طبيب ولا اى حد يقدر يحدد موت انسان ومين عارف ممكن حاله كل الناس شايفه انها ميؤوس منها وتخف بأذن الله ويتكتب له عمر جديد ولو فرضنا انه هيموت يبقى مش لازم اموته موت على موته واقوله روح انت ميت واضلم الدنيا فى وشه على اخر ايامه لازم يكون فى رحمه فى التعامل




س6... لو سمح ليك برؤيه الرسول عليه الصلاة والسلام وانك تقوله جمله واحده بس او كلمه واحده هتقول ايه؟

اقوله بحبك يارسول الله يا اعظم خلق الله وسامحنا اننا مش قادرين نرد الاسائه اللى اتقالت فى حقك بس انت اعظم من اى كلام او ردود ندافع بيها عنك




س7... لو طلعت القمر هتكتب ايه؟

بصراحه مش فاهمه السؤال اوى بس لوقصدك هكتب ايه على سطح القمر هكتب بحبك يا فلان وفلان ده اسم عريس الغفله اللى هحبه ان شاء الله وتكون امه داعيه عليه بيا




س8... لو اتخطبت او اتخطبتى لواحد واثناء الخطوبه اكتشفتى ان الطرف الاخر غير قادر على الانجاب هتعمل ايه؟

صعب اجاوب على السؤال ده لانى بحب الاطفال جدا ثانيا لازم اكون فى الموقف نفسه وعيشاه عشان اقدر احكم هيكون تصرفى ايه ساعتها ومدى حبى لخطيبى هيكون قد ايه مثلا وساعتها اقدر اجاوب




س9... لو كنا فى عصر ازدهار الاندلس كنت تتخيل نفسك ايه؟

بياعت عصير قصب ههههههههههه بهزر طبعا ... اممممممممم كنت احب ابقى مهندسه ومعرفش بقى ايامها كان اسمها ايه ولا يمكن مكنش فيه اصلا معرفش بقى




س10... لو انت مررت التاج ده لحد ومجاوبشى عليه هتعمل فيه ايه؟

هعملوا كفته لالالالالا هخلع راسى وادعى عليه ساعه مغربيه لالالالالالالالا هرفع عليه مطوة سن فيل لالالالالا برضوا انا افوض امرى لله وخلاص وهو الخسران مش انا ( ايقون واثيق من الفوز)




س11... لو هتسافر اى مكان فى الدنيا تعيش فيه هتروح فين؟

على راى الاغنيه على بلد المحبوب ودينى يعنى اعيش فى البلد اللى هيكون فيها قلبى او مع الانسان اللى بحبه مهما كانت بقى بس انا عن نفسى بفضل اى مكان جوة مصر




س12... لو مررت التاج ده هتمرروا لمين؟

احب اشكر صاحب التاج واشكر اللى مررلى التاج واشكر ساعى البريد اللى وصلهولى واشكر الظروف السعيده اللى خلت النت يشتغل عندى واجاوب التاج وفى النهايه مش احب اسمع اغنيه لالالالاء احب ادبس كل اصحابى المدونين اللى لسه مجاوبوش على التاج ده واقولهم يلا اشربوا بالهناتو والشفاتو مطرح مايسال يجاوب يارب

الاثنين، ١٠ مارس ٢٠٠٨

الحب الالكترونى

Orkut Scrapbook Comment Graphics

بعد فترة غياب ليست بالقصيرة عن التدوين والكتابه .. فترة كنت بهيس فيها شويه مع نفسى وببعت صور وكلام فارغ فجاه وعلى حين

غفله نزل عليا وحى الموضوع الجديد واللى كنت متشوقه من زمان اكتبه وفكرته فى دماغى بس مش عارفه اوصل لكلام يوصل الفكرة دى بس اخيرا وجدتها على راى عمنا نيوتن لما نزلت على نفوخوا التفاحه وبسببها اكتشف سر الجاذبيه .

الموضوع يا اخوانى وباختصار هو انى عاوزة افهم سر العلاقه الرهيبه بين النت والحب . هو فى اصلا حب عالنت يعنى حب بالمراسله؟ ممكن حد يرد عليا ويقولى اه مهو المراسله دى والتعارف بيتم عن طريق الشاتنج ومن خلال الكلام ده بيتم التعارف وكل اتنين بيكتشفوا افكار بعض من طريقه كلامهم سوى.. وواحده واحده يبدا ينشأ بينهم نوع من التوحد فى التفكير والاراء ثم المشاعر ثم تقع الفاس فى الراس ويحبوا بعض ويبدا الكلام يروح فى اتجاه تانى خالص من بعد ما كان تعارف عادى جدا الى تعارف حار جدا جدا مليان بالمشاعر والاحاسيس الجميله.


انا طبعا حاولت استنتج ان ده السيناريو اللى ممكن يكون حصل وكانت نتيجته مايسمى بالحب الالكترونى . ياترى يمكن ده وهم وهو مجرد تعود يعنى انا اتعودت اكلم الشخص ده وهو اتعود يكلمنى او انهم بيرتاحوا لبعض وكل واحد فيهم بيلاقى اللى يسمعوا يعنى مجرد اذن تسمع التانى وهما ترجموا ده انه حب؟ ولا ده حب بحق وحقيق وبيحصل بصرف النظر عن الطريقه اللى تم بيها ؟

اللى يحير انى مرة سمعت ناس بتقول حب من اول نظرة يعنى واحد شاف واحده وحبها بمجرد ماعينه وقعت عليها !!! يمكن انا بخرف؟ الله اعلم . يبقى مش غريبه ان اتنين يتعرفوا عالنت ويحبوا بعض بشرط الصدق فى العلاقه دى بين الطرفين وكل واحد وضميروا بقى مع ان حته الضمير دى بقى مشكوك فيها اليومين دول.

حد يريحنى ويقولى فى حب بالمراسله ولا مفيش ... واسمع ناس بتقول انها اتجوزت من عالنت وانهم اتعرفوا عليه .. طب اصدق مين الناس دى ولا عقلى اللى بيقولى ده لعب عيال ووهم كبير مفيش حب بالطريقه دى.. وارجع تانى واقول الحب ملهوش مكان ولا معاد ولا زمان ولا طريقه لانه ببساطه مشاعر واحاسيس خارجه عن ارادتنا زى سهم بيترمى فى القلب بدون مقدمات وبعدها تشعر باعراض الحب فى قلبك

وتفضل تسال نفسك طب حصل امته وازاى دنا مأمن على قلبى ضد الحب .

وبصراحه كلنا بندور على الحب لان صعب حد يعيش من غير مايحب ويتحب ويتعب طبعا من الحب ده مهو كل حاجه فيها جنه ونار

ولو فشلنا نقول مهو العيب فى طريقه التعارف نفسها او اننا معرفناش الطرف التانى كويس . طيب اهو النت متهيالى وسيله هايله للتعارف بحريه ومن غير قيود . ودا مش دفاع عن الحب عالنت او انى مصدقه الكلام ده بس بحاول اقنع نفسى بالفكرة واستخدم عقلى بدل من قلبى اللى هيودينى فى داهيه ده .

وياريت كلنا نفكر ونوصل لحل موحد هل دا حب ولا تسليه وتضييع وقت ولا تعود وارتياح ولا وهم ولا لعب عيال وناس فاضيه ولا ايه بالظبط !!!!!!

السبت، ١ مارس ٢٠٠٨

اشمعنا الانترنت


المرة دى انا مش هكتب موضوع له علاقه بالحب خالص . المرة دى هكلمكم عن حاجه

استفزتنى اوى وكنت مضايقه بسببها واعتقد انكم مش هتختلفوا معايا فى الموضوع ده

الموضوع اللى هتكلم عنه هو ( الانترنت )

من فترة بدات كل البرامج التليفزيونيه او معظمها تتكلم عن النت وناس تطلع فى البرامج

دى تتكلم وتهاجم الانترنت بشده وكأنه هو سبب البلاوى كلها . وفى مرة لقيت والدى

العزيز بينادى عليا وتعالى بسرعه وبعدين بقولوا خير فى ايه انا بقى قولت الدنيا اتهدت

لقيتوا بيقولى خلالالالالالالاص انا هفصل النت ده نهائى ... بصيت له كده باستغراب

طب ليه هو حصل منى حاجه ؟ ده النت هو الحاجه الوحيده اللى عوضتنى عن الملل

اللى الواحد عايش فيه بما انى من العاطلين او اللى مش لاقيين شغل فعندى وقت فراغ

غير عادى وبصراحه لقيت نفسى عالنت وعملت صداقات ناجحه جدا مع ناس محترمه

جدا جدا وعملت المدونه الخاصه بيا واللى بفرغ فيها جميع الطاقات اللى جوايا وبتكلم

فيها بحريه وكمان اصحابى بيشاركونى برايهم فيها .

وفجاه الاقى كل ده بيضيع منى بسبب برامج تليفزيونى عاوز يعمل سبق او يشد الناس

بأى موضوع يعمل جدال مع الناس وخلاص وقال يعنى كل مشاكلنا خلصت وملقيناش غير

النت عشان نتكلم عنه وياريت الناس اللى بتتكلم دى بتقول الحقيقه انما للاسف كلهم بيهاجموا

وبس وكأن الانترنت نت هو سبب كل البلاوى اللى فى الدنيا وان ده اختراع ملهوش اى فوائد

ولا قيمه غير انه بيضر بمصلحه الشباب وبيؤدى الى الانحراف .

طيب انا هسال اى حد هاجم الانترنت وقال عليه كده واقوله هاتلى حاجه فى الدنيا عموما

ملهاش اضرار او ملهاش عيوب.. اى شئ فى الدنيا له عيوب ومميزات لان الكمال لله وحده

دا حتى الانسان له عيوب ومميزات حتى الادويه اللى المفروض انها شفاء وعلاج لكثير

من الامراض اتحداكم ان هناك دواء فى العالم تم اختراعه وليس له اعراض جانبيه

حتى البنسلين وهو اامن دواء حتى الان لايمكن استخدامه للمرة الاولى بدون التاكد

من عدم حساسيه الجسم له.

وعندنا مثلا المخدرات بانواعها كان الانترنت هو اللى قال للشباب يبقى مدمن مخدرات

اللى عاوز ينحرف او يمشى غلط مش هيستنى الانترنت الاساس هو التربيه السليمه

والاهل وعلاقه الانسان بربه مش نقول الانترنت او غيروا . على الاقل الانترنت فيه

مواقع تعليميه ودينيه وترفيهيه يعنى متنوع ومفيش اجبار على شئ الاساس هو الانسان

نفسه واستعداده للانحراف والغلط من عدموا.

وياريت زى ما البرامج بتستضيف ناس تهاجم الانترنت ككل يستضيفوا ناس يكون ليها راى

مختلف يعنى نعرض وجهت النظر وعكسها مش نهاجم وبس من اجل الشهرة ونعمل برنامج

يكسر الدنيا وخلاص.

وياريت كل الاهالى يكون عندها ثقه فى اولادهم وفى تربيتهم الانسان هو رقيب نفسه

عمل خير لنفسه .. عمل شر برضوا لنفسه وفى النهايه هو اللى بيتحمل نتيجه اعمالوا

الاثنين، ٢٥ فبراير ٢٠٠٨

خمسه فرفشه

مش هطول عليكم ولا اتعبكم فى القراءة ولا اى حاجه لان ببساطه انا مش كاتبه موضوع
ولا ناويه اقول خطب وشعارات ولا بحب السياسيه . انا واعوذ بالله من كلمه انا انسانه
تعشق الضحك جداااااااااااا . وطبعا كلنا عارفين ان الضحك دلوقتى بقى عمله نادرة
فىهذا الزمن . ولاحظت ان كتير من اصحابى المدونين اصابهم الاكتئاب المفاجئ وبلا اسباب
تيجى تسالوا ولا تسالها مالك ؟؟ يقولوا مضايقين وقرفانين ونفسنا نضحك . طيب خير من
ايه ياجماعه ايه السبب؟ يقولوا مش عارفين ايه هو السبب اهو مخنوقين من عيشتنا وخلاص
ونفسنا نضحك .
بقينا بنتلكك وبندور على اى حاجه تضحكنا وتطلعنا من اللى احنا فيه . عشان كده فكرت
اعمل البوست ده واسميه خمسه فرفشه هى حاجه خفيفه تضحكنا والسلام اهو احسن من
مفيش .
وغالبا فى ناس هتدخل وتقول صور قديمه هع هع هع وناس هتقول دى نكت بااااااايخه
بس انا بالنسبه لى الحاجات دى كانت جديده واتمنى انها تعجبكم انا كل هدفى انكم تضحكوا
مش هدفى اعمل سبق صحفى ولا اجيب صور ونكت نادرة

اسيبكم بقى مع بعض الصور المضحكه واتمنى تعجبكم





بريزيدون صح الصح








نخله وناقصها البلح













ااااااااه يانوم يانوم الله الله .. ياصباح المكرونه
















حنان الام هههههههههههههه







اللى هيكلمنى هقطعوا انا بقولكم اهو




لا تعايرنى ياشارون ولا اعايرك ده الاصل المر طايلنى ياخويا وطايلك


السبت، ٢٣ فبراير ٢٠٠٨

يامظلومين بالقوى يا أحنا





ياترى ليه دايما الاقوال المأثورة عن المرأة كتير وللاسف كلها ضدها مش فى صالحها؟ زى

المثل الفرنسى الشهير (فتش عن المرأة) مع انه كان اولى يقولوا فتش عن الرجل هههههههه كانوا

هيلاقوا بلاوى مستخبيه .. وفى الايه القرانيه اللى بتقول (إن كيدهن عظيم) . وحتى فى نتيجه 2008مثلا

شوفوا الظلم وصل لحد فين بقطع ورقه لقيت مكتوب فيها ( لولا وجود المرأة لكان الشيطان من العاطلين)

قال يعنى احنا اللى مشغلين حضرته.. والله هو شغال بينا او من غيرنا وأكلها ولعه زى مابيقولوا

ههههههههه.

تعالوا بقى نشوف الاستاذ انيس منصور اللى بحبوا اوى اوى كاتب ايه فى العمود بتاعه بجريده

الاهرام (يتوهم الرجل انه سقط فى أحضان المرأة ... والحقيقه انه سقط فى يدها ) على اساس

اننا بنتكلم عن الفك المفترس او ست السيد . بزمتكم عمركم سمعتم عن ست السيد؟ ولا دايما كنا

بنقول سى السيد وافتراه وظلموا لمراته المسكينه.

وفى جمله تانيه لانيس منصور برضوا بتقول ( إذا الرجل كذب فهو إجتهاد...وإذا المرأة كذبت فهى غريزة )

شايفين الظلم قال يعنى الراجل ياعينى لا بيهش ولا ينش ولا بيعرف يكدب ياعينى بيجتهد عشان

يكدب بيعمل مجهود ياعينى إنما احنا معجونين بميه كدب واخدين دكتوراه يعنى فى الكدب .

هى الآيه اتقلبت ولا ايه ؟؟؟

ليه كده بس ؟ ليه بنوصف الرجاله على انهم ملايكه والستات هى اللى مليانين شر مع ان فى

رجاله تستاهل الحرق .. انا طبعا مش بعم الكلام على كل الرجاله لان اى شئ فيه الكويس

وفيه الوحش ولا يعرف الشئ الا بضده.

كلنا جوانا الاتنين الخير والشر .. والاتنين فى صراع مع بعض والشاطر هو اللى يقدر

يخلى الخير اللى جواة يتغلب على الشر بس طبعا دى معادله صعب تحقيقها ومحتاجه اراده

قويه ده غير العوامل الخارجيه اللى بتأثر علينا يعنى احنا بنحارب فى كذا اتجاة.

وطبعا الظروف او العوامل دى على الاتنين الرجل والمرأة على حدا سواء ومفيش انسان

اتولد ومعاه الشر بس احنا جوانا الاتنين الخير والشر فياترى بقى الاقاويل اللى طلعت

على المرأة دى صحيحه ؟ ولو صح طب ليه مقولناش نفس الاقاويل دى على الرجل مع

ان الاتنين خاضعين لنفس الظروف وعايشين فى نفس البيئه واللى خالقهم واحد.


اسفه على الاسهاب فى الموضوع والاطاله بس سامحونى الموضوع مكنش ينفع فيه اقل

من كده وياريت الاقى حد معايا فى رايى عن المرأة.

الجمعة، ١٥ فبراير ٢٠٠٨

عيد الحب ؟؟؟؟؟؟؟؟


امبارح كان عيد الحب كل سنه وانتم طيبين معلش هى جت متاخرة شويه بس على ما حسيت بقى

ان فى حاجه اسمها عيد الحب تقريبا فقدت الاحساس بحاجه اسمها حب ومعلش على التشائم اللى

انا فيه ده بس لقيت كل المدونين فرحانين ومظاططين وحاسين فعلا ان فى حاجه اسمها عيد الحب

وبيهنوا بعض بيه .

سمعت الكلمه دى امبارح ( هابى فلانتين) واعزرونى كنت برد اقول وانتوا بالصحه والسلامه او وانتم

طيبين بس حسيت ان الكلمه دى مش ليا بصراحه كنت مستنياها من حد تانى ومش هوضح اكتر من

كده اصلى وش كسوف هههههه .

المهم عيد الحب السنه دى شكلوا فاتنى واتمنى ان عيد الحب اللى جاى ميفوتنيش واحس بيه بجد

ومن قلبى واكتب بوست عنه السنه الجايه وافرحكم معايا قولو امين .

بس ده ميمنعش انى كتبت عن عيد الحب النهرده بعد ما عدى بيوم اهو حاجه تفرح العيال وابو العيال

ومش عاوزة اطول اكتر من كده احسن اخبط فى السقف وهابى فلانتين يا كل البشررررررر

الأحد، ٣ فبراير ٢٠٠٨

تاج 2


هل توافق على حزف خانه الديانه من البطاقه الشخصيه؟

لاء طبعا ازاى نحذفها فى اساسيات لازم تفضل

هل تعتقد بوجود اضطهاد مسيحى فى مصر؟؟

لاء لاننا اطيب شعب فى الدنيا سواء مسلمين او مسيحيين

يمكن ده مجرد احساس بس مش فى محله مفيش اضطهاد

من هو الشخص اللى تختارة لرئاسه مصر؟

مش اسم معين بس اختار اى شخص يقدر يحقق للشعب احلاموا

ويرفع الظلم عن الناس ويحس بيهم . شخص من وسط الناس البسيطه

مش واحد يعيش فى برج عالى بعيد عن الناس

اذا قمت بتاسيس الحزب السياسى من هم الاشخاص الذى ستقوم بضمهم؟

فاروق الباز - عمرو موسى - طلعت السادات - زويل - يمكن فى ناس

تانيه انا نسياهم بس اكيد هختار الناس اللى بتحب شعبها وتحس بمشاكله

هل توافق على مشاركه كلا من الاقباط والاخوان المسلمين فى الحكم؟؟

لاءطبعا

هل تعتقد ان توريث الحكم سيتم فعلا؟؟

ايووووووووووووووووون وحسبى الله ونعم الوكيل فى اللى فى بالى

فى رايك الشخصى ماهو افضل انجاز لحكومه مبارك؟

انجازات ايه كفى الله الشر ونبى منا فاكرة يمكن الزهيمر بقى

ماهو اسوء عمل قامت به هذة الحكومه؟

المفروض كنت تقول ماهى اسوء اعمال مش عمل واحد . كتير اوى

بس اللى واجع الناس هو غلاء الاسعار وعدم الاحساس بالامان وانت

فى بلدك خايف لييجى اليوم اللى متلاقيش فيه لقمه

فى رايك الشخصى ماهى افضل مدونه قمت بزيارتها على بلوجر؟

هيبقى ظلم لو قولت مدونه واحده بعينها لان بصراحه فى كل مدونه

دخلتها حاجه عجبتنى مثلا مدونه شمس ونوشه وبطه ومارو واحمد الصباغ

ويارا واميرة ومدونه اسمها بنت بلد عجبتنى برضوا والشاعر ناس كتير

واعذرونى لو نسيت حد

للاناث فقط. هل توافقين على الزواج من رجل مطلق؟

لاء

اذا تزوجت وانجبت بنتين وولدين ماذا ستسميهم؟؟

يوسف وملك ومروان وايتن وطبعا الاسماء دى مبدئيا بس

اخيرا الى من تمرر هذا التاج؟؟

لكل اللى يحب يجاوب عليه




تاج وادبست فيه من شمس الزناتى بس حلو



دخلت مجلس الشعب من اوسع ابوابه .. ايه هو رمزك الانتخابى؟؟

السيف او الميزان . من الاخر رمز يكون ليه علاقه بالعدل

كنت تفضل الدخول مستقل ولا تتبع حزب معين؟؟

انا مع حزب الحق بس للاسف مفيش حزب للحق يبقى طبعا مستقله

دخلت مستقل فهل توافق على التوقيع للحزب الوطنى بعد فوزك؟

لاء طبعا هو يعنى الحزب ناقصنى انا. انا اللى فيا مكفينى

اول حاجه هتعملها لنفسك ولا لاسرتك؟

الكدب خيبه لنفسى الاول واكيد بعد كده هيعود على اهلى

ايه المشروع اللى ناوى تعملوا لاهل ايرتك دون ذكر اسم الدايرة؟

نفسى اصلح كل حاجه فيها الشوارع والبيوت تبقى اجمل وامنع السرقه سرقت

اى حاجه او بمعنى تانى الفساد .

قعدت فى المجلس جمب نائب مميز مين هو؟؟

طلعت السادات

قدمت سؤال للحكومه ايه هو السؤال؟

هتمشوا امته وترحمونا امته التغيير الوزارى الجديد بقىىىىىىى

طلب احاطه موضوعه ايه وبتقدمه لمين؟

طلب الاحاطه هقدمه للحكومه وهسالها امته المواطن المصرى هيعيش

ويتعامل معامله كريمه

استجواب لاتنين من الوزراء موضوعه ايه وتستجوب مين؟؟

وزير العدل وهسالوا هو فى عدل فى البلد دى . ووزير الصحه هقولوا

انت كويس بس الفساد اكبر منى ومنك ونفسنا نتعالج صح فى بلدنا ياريت

تشوف لنا حل وحياة المواطن المصرى يبقى ليها اهميه اكبرمن كده وتمن

انت مع الخصخصه؟؟؟؟؟؟؟

لاء طبعا لانها مش حل اننا نبيع شركات ومصانع ونستغنى عن ناس كانت

عايشه من الشغل فى الامكان دى ونديهم قرشين ونقولهم مع السلامه

هل انت مع قطع العلاقات مع اسرائيل؟؟

طبعا

ما يترتب عليه من معامله العدو هل تؤيد فكرة الحرب على العراق؟؟

لاء طبعا لا العراق ولا اى بلد عربى

هل تؤيد مرور الامريكان فى القناة؟

والله لو مرور عادى مش بغرض ايذاء حد او لاى اسباب سياسيه يبقى اوافق

الأربعاء، ٣٠ يناير ٢٠٠٨

موضوع يحير فقولت اخد رايكم فيه


ياترى اى اتنين مخطوبين حدود علاقتهم وكلامهم مع بعض ايه يعنى هل فى حدود اصلا ولا المفروض انهم يلغوا اى حدود بينهم فى الكلام؟ يعنى طبيعى يتكلموا مع بعض عن كل حاجه لدرجه الكلام فى الحياة الزوجيه بحجه انهم كده بيتعودوا على بعض اكتر . بصراحه الموضوع يحير لانهم لازم يتعودوا وياخدوا على بعض وفى نفس الوقت مش كل حاجه مباحه ومسموح بيها . اينعم الخطوبه فترة تعارف بس معتقدش انها توصل للكلام فى مواضيع محرجه اوى كده . اعتقد ان التجاوزات ممنوعه على الاقل من الناحيه الدينيه . السؤال ده سالتوا لبنت مخطوبه ردت عليا وقالتلى ان الكلام ده طبيعى جدا لانه خطيبى وهيبقى جوزى فى المستقبل ولازم ناخد على بعض قبل الجواز وبنتكلم فى كل حاجه بصراحه ومفيش مانع من القبلات كمان . وقالت ان كل الناس او اى اتنين مخطوبين بيعملوا كده يعنى الاختلاف ممكن يكون فى الدرجه من واحد للتانى مش فى الموضوع نفسه يعنى ده بيحصل بين الكل وان هى مش حاله شاذه. عشان كده حبيت اخد رايكم فيه ياترى مين الصح ومين الغلط. يعنى هو ده الطبيعى وانا اللى مش طبيعيه وبفكر غلط ومعقده؟ ولو النوعين موجودين يعنى النوع المؤيد والمعارض للموضوع ده موجودين ياترى مين النسبه الغالبه فيهم؟

ملحوظه الكلام ده مفيش اتنين هيختلفوا انه حرام من الناحيه الدينيه انا بتكلم عن الطبيعه البشريه نوافق ومنعقدش الامور ولا نرفض الكلام والتجاوزات دى اذا صح التعبير واعتبرناه تجاوز؟؟

الاثنين، ٢٨ يناير ٢٠٠٨

مشكله اسمها الحب


الحب ؟؟؟ ياترى احنا فهمين معناه صح .ياترى هو موجود اساسا ولا ده وهم وبنعيش فيه.

طيب فى حد يستاهل حبنا لو فرضنا ان الحب موجود. ليه دايما سلسله مشاكل الحب مش بتنتهى

او بمعنى تانى مفيش نهايات سعيده كتير لاى اتنين بيحبو بعض. يمكن لان واحد من الطرفين

خدع التانى او بلاش بيخدعوا نقول فهموا بعض غلط ؟ مفيش حد فينا ممرش بتجربه حب وغالبا

التجربه الاولى بتفشل مع ان اول حب فى حياتنا بيكون اصدق حب ودا رايى الشخصى . اى حاجه

فى اولها بتكون حلوة زى اول كلمه رقيقه ممكن نسمعها او اول دقه قلب تحس فيها انك انسان

وعندك قلب بيدق وبيعرف يحب واكيد الحب ده مش بيتنسى او على الاقل بيبقى ذكره .

ممكن طبعا اللى يقرا الكلام ده يقول انى مش واقعيه وان مفيش حب ولا قصص رومانسيه وان

الحب الحقيقى هو اللى بييجى بعد الجواز . وان مفيش حب غير حبك لزوجتك او لزوجك .انا

مش معترضه على الكلام ده بس ياترى مفيش حب وبعدين لو فى توافق بين الطرفين يحصل

زواج؟ فى ناس هتقول حرام . بس انا بتكلم عن لغه القلب دى احاسيس ومشاعر مينفعش تخضع

لقوانين وقواعد .

ياترى فى طريقه نفرق بيها بين الحب الصادق والحب المزيف؟؟ ياترى لغه صدق حدس قلبك

وخليها على الله واخلص النيه ونم فى البريه كل دى اسباب كفايه عشان نفرق بين الحب اللى بجد

والحب المزيف؟ هو طبعا مينفعش نقول عليه حب بس ياترى فى طريقه لقياس درجه حب الطرف

التانى؟

الاسئله كتير انا عارفه بس ده لان الكلام فى الموضوع ده يحتاج لمليون بوست زى ده بس انا

كنت محتاجه اتكلم او ممكن نسميها فضفضه مع الذات.

دعوة للتفائل (علاج سريع)

كل الجروح ليها دواء ياطير يا حالم فى الهوا ... كل الجروح ليها دواء ياطير ياحالم فى الهوا
اطوى الجناح على اللى الجراح اطوى الجناح على اللى راح واضحك ؛ ويلا نطير سووووى
انا مش هبيع الصدق بالاكاذيب ولا قولش للحم الوديع ياديب ولا قولش للديب يا اعز حبيب
الصدق مهما عز فى الازمه مش ههتز, الصدق مهما عز فى الازمه مش ههتز
ساعات يكون كتم الانين اصدق وانا مهما اقع راح اقوم ودى مساله مبدا
كل الجروح ليها دواء ياطير ياحالم فى الهوا... كل الجروح ليها دواء ياطير ياحالم فى الهوا
اطوى الجناح على الجراح اطوى الجناح على الجراح واضحك ويلا نطير سوووى
بيكدبوا الصدق اما الكدب يتصدق... يالليل يالليل تطول بكرة تلقى ؟ الفجر بيشقشق
بيكدبوا الصدق اما الكدب يتصدق ...يالليل يالليل تطول بكرة تلقى الفجر بيشقشق
انا فى انتظار الصباح خلاص داويت الجراح وخلاص نسيت اللى راح ومن جديد هبدا
ودى مساله مبدا