الارتباط بأخر له ماضى

هل توافق على الارتباط بأخر له ماضى ؟؟؟؟؟؟ هو ده السؤال اللى بطرحوا عليكم النهرده . سؤال مش سهل الاجابه عليه لان الماضى انواع وكمان بالنسبه لى غير بالنسبه ليك يعنى كل واحد وله وجهت نظر فى الموضوع ده . وبعدين حب زمان اختلف عن حب دلوقتى يعنى مثلا حب عبد الحليم فى الوساده الخاليه لسميحه او لبنى عبد العزيز غير حب عمر لسلمى . فاياترى زى ما نظرتنا للحب اتغيرت عن زمان الماضى كمان نظرتنا ليه اتغيرت ولا لسه زى ماهى فكرتنا عنه؟ يعنى مثلا فى ناس قالتلى الماضى انواع على حسب نوع الماضى ده كان ايه هل هو مشرف ولا غير مشرف؟؟؟ وطبعا البنات رايهم هيختلف شويه عن الشباب يعنى لو بنت ممكن يكون رايها انها تسامح حببها على ماضيه مهما كان بس يقولها الحقيقه ويصراحها بيها .
لو ولد بقى ممكن يقول افكر او يرفض ان حببته يكون ليها ماضى اصلا وحتى لو اتظاهر بالموافقه هيكون من جواة مش راضى على الكلام ده .
ملحوظه اخيرة دى مجرد وجهت نظر والحكم للشباب من الجنسين انتوا اللى هتقولوا رايكم فى موضوعى ده ونشوف حكايه الماضى دى من وجهت نظر الجيل الحالى ايه.
ياجماعه ارجو منكم الصراحه مش عاوزة كلام انتوا مش مقتنعين بيه

مين اللى يتقال عليه متعلم

ياترى مين المتعلم فى نظرنا هل هو الانسان اللى اتخرج واصبح معاه ليسانس او بكالوريوس او حتى دكتوراه ؟ مع احترامى لراى الجميع مش كل الى يحصل على شهاده جامعيه يتقال عليه متعلم . شباب وناس كتير الظروف حرمتهم من التعليم او انهم يستمروا فيه ومع ذلك تقدروا تقولوا عليهم مثقفين بكل ما تحمله الكلمه من معنى . انا فى راى ان الشهاده مش دليل على ان الانسان اللى حصل عليها متعلم لان التعليم مبقاش زى زمان كالماء والهواء دلوقتى اصبح حفظ وبس عشان ندخل نكتب الكلمتين اللى حفظناهم فى ورقه الاجابه وبس وبعد كده تنسى كل اللى اخدته وتقول انا معايا شهاده وخلاص . التعليم دلوقتى بقى للمنظرة او ورقه تتعلق فى برواز وخلاص بس طبعا لكل قاعده شواذ يعنى انا مش بعمم الكلام ده لان فى ناس بتقدر قيمه العلم صح ومش بتعتبره شهاده وخلاص . انا بسال مين اللى يتقال عليه متعلم عشان شوفت شاب بسيط اوى الظروف كانت اقوى منه ومقدرش يكمل تعليمه واكتفى بالمرحله الاعداديه رغم ان كانت امنيه حياته يكمل تعليمه ويحصل على شهاده جامعيه زى ما بيقول عشان يبقى ليه مكانه فى المجتمع مثل اخواته اللى اتموا مرحله التعليم ومنهم اللى وصل للدكتوراه والماجستير كمان . يمكن الشاب ده حاسس انه اقل من حاصلى الشهادات الجامعيه بس انا فى نظرى انه ميقلش اهميه ولا مكانه عنهم لسبب بسيطه لان محب للقراءة جدا نقدر نقول انه علم نفسه بنفسه من غير مايدخل مدارس ويحصل على شهادات رسميه . رغم انه مكملش تعليمه بس تقدر تناقشه فى اى موضوع يكلمك بجدارة وكمان يوثق كلامه بالادله والبراهين من مختلف الكتب وفى جميع الفروع .
اللى عاوزة اقوله ان التعليم مش شهاده وبس لان فى ناس لم تحصل على شهادات بس احسن من ناس كتير اتعلمت وهى لاتفقه شئ . ده مش هجوم على التعليم بس دى مجرد وجهت نظر

جحود وظلم بدرجه امتياز

القصه دى قصه حقيقيه وانا اعرف بطلها شخصيا هو شاب لسه فى ريعان شبابه بس للاسف بيتحمل ذنب مش ذنبه الحكايه ببساطه تبدا كالاتى الشاب ده والده كان مهندس زراعى وطلع معاش مبكر هو ووالدته وكان المعاش عبارة عن 7 افدنه زراعيه الوالد كان الاخ الكبير لاخواته البنات وطبعا هو اللى تحمل نفقات زواج اخواته البنات ومكنش بيرفض لهم طلب وطبعا كان كل مايحتاج فلوس يبيع جزء من معاشه او الارض لدرجه ان حتى بعد جواز اخواته البنات كان بيساعد ازواجهم بمبالغ من المال عشان يعملوا بيها مشاريع خاصه بيهم . نرجع تانى بقى للباشمهندس والاخ الكبير فى الفترة دى كان بيدخل فى مشاريع كتيرة وللاسف كلها بتفشل فشل زريع لدرجه انه باع كل اللى يملكه واستلف كمان والديون بدات تتراكم على الاسرة.
وسط كل المشاكل والديون دى الاب كان عنده 7 أولاد فى مراحل التعليم المختلفه وبطل القصه كان الابن الكبير وكان بيشتغل عشان يصرف على تعليمه لحد ما اتخرج من كليه الزراعه وربنا وفقه وقدر يشتغل فى احد مصانع الالبان بدا كعامل بسيط فى الوقت اللى زميل له اتعين مهندس فى الشركه وده طبعا بسبب الكوسه والوسطه المهم الشاب ده كان بيحارب وبيحاول يثبت نفسه وسط كل الظروف الصعبه اللى هو فيها لحد ما وصل انه يبقى كبير مهندسين .
طبعا المرتب كان يادوب بيسدد ديون الوالد اللى صحته اتدهورت من كتر الهموم فى وسط كل ده الشاب ده نسى نفسه ونسى ان ليه قلب بيدق وبيحب وله مشاعر . وفى يوم عجز الشاب ده عن سداد القسط الشهرى للبنك واتصل باحدى عماته الكريمات ليطلب منها مساعده ماليه وقالها ياعمتى انا محتاج الف جنيه اسددها للبنك والا هتسجن قالت العمه مش معايا اجيبلك منين وقفلت سماعه التليفون فى وشه مع ان الديون دى كانت بسببها هى واخواتها بس نقول ايه للانانيه والجحود الواضح . المهم ان فى مرة الشاب ده اتعرف على بنت على النت ومقدرش يقاوم مشاعره اللى صحيت فجاه بعد ما كانت شبه معدومه بس الديون مش بترحم وهو خايف ان الانسانه اللى عطته الامل فى الدنيا تضيع منه بسبب الديون اللى مش بتنتهى .
اللى عاوزة اقوله من القصه دى ان ياريت الضمائر تصحى ونبطل انانيه وجحود وظلم لو ده حصل اكيد قصه الشاب ده ووالده مش هتتكرر . فين ياجماعه صله الرحم بقى هو ده جزاء اللى يعمل معروف وقت الشده ميلاقيش اللى يقف جمبه ومين اقرب الناس ليه تتخلى عنه؟

غلطه مين البنت ولا الولد؟؟؟

ليه دايما البنت لازم تشيل غلطتها وغلطت غيرها ؟؟ انا مش بدافع عن البنات ولا بقول انهم ملايكه دايما بس اللى بيحصل كالاتى اى ولد يلعب بمشاعر اى بنت وعواطفها يجيب اللوم عليها ويقول هى عاوزة كده انا مليش ذنب هى عاجبها كلامى انا مالى بقى؟ وتلاقى الولد يقول اصل البنات عندهم حرمان عاطفى ونقص وعاوزين يعوضوا النقص اللى عندهم عاوزين يحسوا انهم مرغوب فيهم وفى حد بيعبرهم وخصوصا علاقات النت . ازاى واحد ضميره يسمحله انه يلعب بعواطف انسان زيه ؟ للدرجه دى مشاعر الناس مبقلهاش قيمه ؟ للدرجه دى الضمير انعدم ؟ للدرجه دى قلوب الناس بقت حجر؟ مبقاش فى حاجه اسمها حب خلاص؟ مفيش حد عارف يحب حد من قلبه ؟ على كده بقى اى اتنين بيتجوزوا بيتجوزوا من غير حب ولا مشاعر زى الجماد؟
انا كلمت واحد مرة فى شاتنج وحكالى عن البنات اللى يعرفهم فى حياته .لقيته انسان عندهم كميه غش رهيبه بيكلم كل واحده ويوهمها بالجواز والحب ويسمعها كلام غايه فى الروعه ويكون بيكلم غيرها فى نفس الوقت وبيقول لها نفس الكلام اللى قاله لغيرها ولما اتناقشت معاه قالى البنات دى تستاهل كده !!!مع ان عنده اخوات بنات وكمان خاطب ومرتبط وبيحب خطيبته جدا بس نقول ايه اللى فى داء بقى ياترى الناس اللى هتقرا الموضوع ده رايهم فيه ايه ؟ انتوا مع مين ؟ مين اللى غلطان ؟ البنت اللى صدقت وسلمت عواطفها فى يد من لايرحم بحجه انها تستاهل ؟ ولا الولد اللى بيتسلى ؟ ولو فرضنا انها غلطت البنت بس ليه الولد ميقاومش نفسه ويكون صوت ضميره اقوى ؟

اول موضوع هكتبه فى حياتى

مش عارفه ابدء منين ومفيش حد معندهوش مشاكل من كل نوع ياترى نبدء بانهى نوع ومين اهم نبدء بيه؟
ياترى اى حد عنده مشكله بيلاقى اللى يسمعه ويحل له مشاكله دى؟ ولا كل واحد شايل همومه لوحده؟ متهيالى ان صوت الجماعه احسن من صوت الفرد يعنى لما نطرح مشكله ونحاول نسمع وجهات نظر بعض فيها افضل بكتير من اننا نسمع راى واحد بس . عشان كده احب اخد راى اللى هيدخل ويقرا الموضوع ده فى سؤال محيرنى وهو ... ليه دايما قصص الحب بتنتهى بالفشل ايه الاسباب وياريت اى حد عنده تجربه حب فاشله بس صادقه يكتب اسباب الفشل وتجربته وايه اللى طلع بيه من التجربه دى . هل ندمت ولا اتصدمت ولا اتعقدت ولا طلعت بنتيجه ايجابيه ؟ وان شاء الله نتكلم بعد كده عن التجارب الناجحه عشان نشوف وجهت النظر وعكسها ونقارن بين الاتنين وانهى فيهم اللى سايده اكتر فى الدنيا.